ഗാർഹിക തൊഴിലാളികൾ നേരിടുന്ന വെല്ലുവിളികൾ നിരവധി; ഐഒഎം ചീഫ് ഓഫ് മിഷൻ

കുവൈത്ത് സിറ്റി: കുവൈറ്റിലെ 730,000 ഗാർഹിക തൊഴിലാളികൾ നേരിടുന്ന വെല്ലുവിളികൾ നിരവധിയാണെന്ന് ‌ഐഎൽഒയുടെ സ്ഥിതിവിവരക്കണക്കുകൾ ഉദ്ധരിച്ച് ഇൻ്റർനാഷണൽ ഓർഗനൈസേഷൻ ഫോർ മൈഗ്രേഷൻ (ഐഒഎം) ചീഫ് ഓഫ് മിഷൻ മാസൻ അബൗൾ ഹോസ്ൻ പറഞ്ഞു. തൊഴിൽ നഷ്ടപ്പെടാൻ സാധ്യതയുള്ളതിനാൽ പരാതികൾ ഫയൽ ചെയ്യാൻ ചില തൊഴിലാളികൾ ഭയപ്പെടുന്നു. അതേസമയം തൊഴിലുടമകൾ വ്യക്തമായ അറിവില്ലായ്മ കാരണം അവകാശങ്ങൾ ലംഘിച്ചേക്കാമെന്നും അദ്ദേഹം കൂട്ടിച്ചേർത്തു.സ്ത്രീകളെയും കുടുംബങ്ങളെയും സംരക്ഷിക്കുന്നതിനുള്ള കുവൈത്തിൻ്റെ പ്രവർത്തനങ്ങൾ ശക്തമാക്കിയിട്ടുണ്ടെന്ന് മനുഷ്യാവകാശകാര്യ അസിസ്റ്റൻ്റ് വിദേശകാര്യ മന്ത്രി അംബാസഡർ ഷെയ്ഖ ജവഹർ അൽ സബാഹ് പറഞ്ഞു. സ്ത്രീകളുടെ അവകാശങ്ങൾ സംരക്ഷിക്കുന്നതിനുള്ള നിയമപരമായ അടിത്തറ നൽകുന്ന ഗാർഹിക പീഡന സംരക്ഷണത്തെക്കുറിച്ചുള്ള 2020-ലെ 16-ാം നമ്പർ നിയമം നടപ്പിലാക്കിയതാണ് മന്ത്രി ചൂണ്ടിക്കാട്ടിയ പ്രധാന നേട്ടം. ഗാർഹിക പീഡനത്തെ അതിജീവിക്കുന്നവർക്കായി മനഃശാസ്ത്രപരവും സാമൂഹികവും നിയമപരവുമായ സഹായം ഉൾപ്പെടെ, സമഗ്രമായ സേവനങ്ങൾ വാഗ്ദാനം ചെയ്യുന്ന അഭയകേന്ദ്രങ്ങൾ ഈ നിയമം വഴി സ്ഥാപിക്കുന്നുവെന്നും ഷെയ്ഖ ജവഹർ അൽ സബാഹ് പറഞ്ഞു. യുഎൻ സംഘടിപ്പിച്ച പാനൽ ചർച്ചയിലാണ് ഇരുവരുടെയും പ്രതികരണങ്ങൾ.